Ni vakaliuca na Kalou kina nomuni bula. Na kena i balebale, mo bula me vaka na lomana. Mo bula me vaka na nona vosa. Ena tikina cavaga o bula tiko kina qori, vuki vua na Kalou. Sai koya na rarama dina ga ni bula. Sai koya na rarama dina kei vuravura. Lako tani mai, ena nodra gaunisala nai valavalaca, kei ira era sega ni vakabauta na Kalou. Vuki vua na Kalou, ka muria na Karisito. Wilika na nomui Vola Tabu, ka masu, ka lolo, me rawa nio kila kina, na lomani Kalou, me baleti iko kei na nomu matavuvale. Kakua ni kauta tani, e dua na nona vosa ka volai tu ena i Vola Tabu mai na nomu bula, de na kauta tani ko koya, na nomu i votavota mai na kau ni bula, mai na koro savasava, kei na veika talega sa volai tu. Kakua ni vakuria na nona vosa sa volai tu, de na vaka i kuri taki vei iko na veika ca, ka volai tu ena i Vola Tabu. Muria ga ka cakava na veika sa volai tu ena i Vola Tabu mo bula. Kerea na nona kaukauwa, na kaukauwa ni Yalo Tabu me vukei iko, mo rawa ni cakava ka bulataka kina na nona vosa.
Na noda Kalou, sa ka levu na nona loloma. Sa dau cudrucudru malua ka dau vosota vadede. O koya oqo, e solia kina na luvena sa dua bauga sa vakatubura, mei soro ni nodai valavalaca na kai vuravura. Kivei ira vakayadua sa vakabauta na luvena, Jisu na Karisito, mera kakua sara ni rusa, mera rawata kecega na bula tawa mudu.
Dou rogoca, ke sega ni dou vakaliuca na Kalou ko Jiova ena nomudou bula, ena tawa yaga na veika dou na sasaga taka. Ena vakatawayagataki, na vua ni cakacaka. Ena talabusese na bula. Ena kasura na matavuvale. Dou na kau vakavesu ka vakararawataki ena veitovo ni bula e yali kina na Kalou, Ni sa yali na Kalou, ena yali talega na nona vakacegu kana muria mai na yaluma, na nuiqawaqawa kei na butobuto ni bula. Ia ni sa oti na bula ena dela ni vuravura oqo, ka dau dokadokai koya kina na tamata, ena gole yani na tamata kina tikina sa vakarautaki ki vua, me vaka na nona i valavala.
Dou rogoca na veika sa tukuna o Akeai na Parofita (Akeai 1: 5-7), “Ia oqo, sa kaya kina ko Jiova ni lewe vuqa; Dou vakananuma mada ki na nomudoui valavala. Sa ka levu dou sa kaburaka, ia sa ka lailai dou sa kauta mai; dou sa kana, ka sega ni mamau kina; dou sa gunu, ka sega ni vakacegu kina; dou sa vakaisulu, ka sega e dua e katakata kina; ia ko koya sa saumi e na nona cakacaka, sa tugana ki na taga sa cicila
Moni lesu vua na Kalou. Dikevi iko vakavinaka se’o tu ena vakabauta dina, se’o iko e dua ka dau vakacacavutaka walega na yacana, dara na kenai sulu ena veisigatabu, ia na lomamu e sinai ena veika e dukadukali, sinai ka uro ena veika ni vuravura oqo, ka yawa mai vua na Kalou na yalodra. Rogoca na vosa nei Paula vei Timoci (2 Timoci 3:5), “sa nodra ga na lotu vakarairai, ka sega vei ira na kena dina; ia mo lako tani mai vei ira sa vakaoqo”. Na Kalou ena vakalialiai rawa, ena dui tauca na tamata vakayadua na veika ga sa tea.
Mo yalo malumalumu mada, ka muria na vosa ni Kalou, me rawa ni yaco vei iko na bula, ka me rawa vakalevu sara. Mo vakaliuci koya ni sa tu vei koya na kaukauwa kei na lewa dodonu kecega ni bula. Emeni.
(published 19/02/2026)