Na digidigi levu ka bibi duadua me cakava e dua na tamata ka bula tiko ena dela ni vuravura oqo , sai koya na nona digitaka na veika, kana vakatulewataka na nona “tawa mudu”.
Tu mada vakadua, tu mada vakamalua ka vakasamataka na vosa oqo, “Na Tawa Mudu”, se kena vosa vakaperitania, “Eternity, Forevermore”. The question that is in front of us all is, “Where will you and I spend eternity or where will you and I want to spend eternity”. E na tikina cava ena “tawa mudu”, o na via kune kina, se mo cava kina. Mo vakasamataka vakavinaka na vosa qo “tawa mudu”, baleta ni sa sega na kena i cavacava sei otioti, ka sa sega kina na gauna.
Rogoca vinaka, e sega ni dua na tamata e sucu vakaveitalia mai ena dela ni vuravura oqo. Ka sega talega ni da nanuma, se ka dodonu, me da na veitalia taka tu na bula e soli wale ki vei keda ena dela ni vuravura oqo. E tiko nai naki ni Kalou me baleti iko, ka tiko talega na nomu i tavi vua na Kalou, o koya sa vakatara mo sucu mai ena dela ni vuravura oqo.
Ena siga e daidai, kei na vei siga ka tu e matada, au via bolei keda eda vakatokai keda me da kai Viti, se ko sa cakava li na digidigi levu ka bibi, ena nomu tiko vakalailai ena vuravura oqo se sega. O sa cakava li na digidigi, ka na vakataudeitaka na nomu i lakolako kina na “tawa mudu”, ka tu kina na reki kei na vakacegu ka tawa mudu, se sega. Ke se sega, mo kusarawa ni se siga toka na vanua, ni se toka vei iko nai cegu ni bula, ni da sega ni kila na noda vei mataka, kei na noda veisiga.
Dou rogoca vakavinaka, e rua ga na tikina ena “tawa mudu”. E dua e kune kina na vakacegu, reki, marau ka tawa mudu, ka dua e kune kina na yaluma, tawa vakacegu, vutugu kei na rarawa tawa mudu. E vosa vakamatata taka tiko na tikina qo nai Vola Tabu (Luke 16:19-24). E rua talega na sala, ka rua talega na matamata ka rau basika kina (Maciu 7:13-14). Na sala raba i lailai, e tavutu kina matamata qiqo, ka basika kina bula tawa mudu. Ia na sala raba i levu, e tavutu kina matamata raba i levu, ka basika kina rusa tawa mudu.
Na sala kina bula tawa mudu sai Jisu na Karisito, ka tukuna o koya ena Joni 14:6, “Oi au na sala, na dina kei na bula, sa sega ni dua na tamata e torovi Tamaqu rawa, ena vukuqu duadua ga”. Na sala kina rusa tawa mudu, sai koya na noda vakanadakui Jisu, eda vakanadakuya na sala ni bula, ka da muria na sala vakatamata, na sala e sega ni tu kina na veivakadonui ni Kalou. Ni da vakanadakuya na Kalou kei Jisu na Karisito, ena tilomi keda ko vuravura, ena tilomi keda na vei sala, kei na vei naki, ka cakacaka kina, ko setani kei ira na nona i vavakoso..
Mo kakua ni wele tiko ena dela ni vuravura oqo, baleta ni vakagaunataka na Kalou na nomu tiko kina. E tukuna nai Vola Tabu, “E sega ni noda koro me da na mai tiko kina vakadua”. Me kakua ni vakawelei iko na veika ni vuravura oqo, na kena i yau, na kena lasa, ni sa ka vaka gauna ga. O iko mo cakacakataki iko kina “tawa mudu” o via kune kina.
Mo yadra mai. Sa rauta na vakamurimuri wale tuga. Ke dua mo muria, muria na gone Turaga o Jisu na Karisito. Mo duri mai, sa rauta na moce, na kana sivia, na gunu kei na mateni, ni sega ni kani kakana se kani gunu na matanitu ni Kalou, sa ka ga ni yalododonu, ia na yalododonu i Jiova ni lewe vuqa, ka dau yaco vei keda ena vuku i Jisu na Karisito.
Nanuma vinaka, na nomu “tawa mudu” sa tu e matamu. Na nomu yacova ena vakatautaki mai na nomu digidigi, mai na veika o vakabauta , ka ko vaka i tavitaki iko kina ena dela ni vuravura oqo.
Digitaka mo muri i Jisu. Ciqomi koya kina nomu bula. Ni o sa digitaki koya, muri koya sara ena yalo dina kei na yalo e malumalumu. Me kakua ni kani vosavosa walega, se kani vakanananu walega. Mo va ka dinataki koya, ka bulataka na nona vosa ena veisiga kece sara, ena nomu tiko vakalekaleka ena dela ni vuravura oqo.
Me vukei keda na Kalou ena noda digidigi, ka vakabibi ena noda “tawa mudu”.
Me da laveta cake na yaca ni bula, na yaca i Jisu Karisito. Me da vakanamata ki vei koya sa cecere sara, na Kalou, ko Jiova ni Lewe Vuqa. Ni sa dodonu me rokovi ka dokai, ni sa nona kaukauwa kecega, na lewa kecega mai lomalagi e cake, e dela ni vuravura kei botoi vuravura.
Emeni.
(Pub 18-Jan-2022)