Mo yadra mai, sa rauta na moce tiko. Rauta na mateni voli ena veivakavuvuli vaka tamata, vakavuvuli vaka tevoro.
Efeso (6:12) Ni da sa sega ni veivala kaya walega kei ira na tamata, eda sa veivala kaya talega kei ira era sa liu, kei ira era sa kaukauwa, kei ira era sa veitaliataka na butobuto kei vuravura oqo, kei ira na veivavakoso yalo ca ena veiyasana vakalomagi.
Oqo, e dua na dina levu eda sega ni taura vakavinaka, se siqema rawa tiko o keda na tamata. Ni da veivala kaya tiko kei ira na veiyalo ca, eda sega ni da raici ira ena matada vakayago. Ia, dau qai laurai ga, ni sa vakamatana taki ena veika e yaco tiko ena dela ni vuravura eda tiko kina qo, na kucu, na laba, na butako, na veivala, na veicacati, na veibutakoci, na lasulasu, kei na veika kecega sa sega ni vaka na loma ni Kalou. Na veika kecega e yaco ena dela ni vuravura ka sega ni vaka na loma ni Kalou, oqo e cakacaka mai kina na vuni ca, kei ira na nona i vavakoso yalo ca. O ira na yalo ca oqo, era dau vakasaqarai ira na tamata era lala tu, tamata era sega ni dau dina, tamata era dau sega ni via vakarorogo, tamata era sega ni via vakabauta na Kalou, mera dau qai vakayagataki ira me vakayacori kina na lomadra butobuto. Rogoca na vosa ni Vola Tabu Pita 5:8 “dou yalomatua, dou vakatawa:sa veilakoyaki voli na nomudou meca na tevoro, me vaka na laioni sa tagi, a sa vakasaqara eso me tiloma.” Na tevoro e wavoki voli, o ira na yalo ca, era wavoki voli. Era vakasaqara eso na tamata mera tiloma. Era vakasaqara eso na tamata mera curuma, ka mera qai vakayacora kina na lomadra butobuto ka dukadukali.
Ni rua tikoga na matanitu lelevu katu e matada. Na matanitu ni Kalou, na matanitu ni rarama, kei na matanitu ni butobuto ka kenai liuliu o setani. Rogoca vakavinaka, ke sega ga ni’o lewe ni matanitu ni Kalou, o iko o lewe ni matanitu ni butobuto. O ira kece era lewe ni matanitu ni Kalou, era vakabauta, kara bula me vaka na loma ni Kalou. O ira kece era lewe ni matanitu ni butobuto, era sega ni vakabauta na Kalou; era dau murimuri lomadra; era dau vorata na loma ni Kalou. E rawa ni ra lotu tiko, ia na yalodra kei na lomadra e uro ena veikani vuravura oqo, ka yawa mai vua na Kalou.
Rogoca vakavinaka, ni sa ka bibi mo kila na dina qo. Ni tiko na matanitu ni Kalou, ka tiko talega na matanitu e lewa kina ko setani. Ke sega, o iko, kei na nomu bula, ena veiciriyaki tu ena dela ni vuravura oqo, ka ona nodra vale na veiyalo ca, kei na veiyalo ni butobuto.
Ka sa ka bibi kina mo kila, ni’o iko, o vale vakayalo. E ka bibi mo kila, ni tiko na Kalou, ka tiko talega o ira na veiyalo ca ka nodra i liuliu ko setani. Ke’o sa vale vakayalo, sa qai rawa, ni’o curumi. E rawa ni curumi iko na yalo ni Kalou bula, na Yalo Tabu, ka rawa talega ni curumi iko e dua na yalo velavela, ka butobuto, kai vavakoso nei setani. Eso e ra bula tu nikua, era sega madaga ni kila nira curumi tu. Dau qai lai vakatakilai ni ra curumi tu, nira sa torova yani nai serau ni Kalou. Era dau qai yavavala kara biubiu kina na veiyalo ca ka veicurumi tu.
O koya oqo, e sega ni dodonu niko bula tu vakaveitalia. E sega ni dodonu ke’o bula tiko ka sega ni kilai koya na Kalou ka vakatara na nomu rairai mai ena dela ni nona vuravura oqo. E sega ni dodonu mo solia tu na nomu bula me vakayacori kina na veika e sega ni vaka na lomani Kalou. Ena rairai ga mai kina na vua ca, na yaluma, na rarawa, na tawa vakacegu kei na veika kecega sa sega ni vaka na loma ni Kalou. Rogoca vakavinaka, o ira kece era vakanadakuya na Kalou, era na kunea na veika rarawa ke sega ena bula qo, ia ena bula se bera mai. O iko mo cakava vakavinaka na nomu digidigi ni sa vakagaunataka na Kalou na bula ena dela ni vuravura oqo. Digitaka na Kalou, digitaki Jisu mo bula.
Ia ni’o sa digitaki Jisu, mo muri koya sara ena yalo dina, ena yalo e malumalumu kei na yalo e vakabauta, ka mo muria na veika kecega sa vosataka, se vosa kina ko koya. Ke’o na talaidredre, lai wilika tale na Pita 5:8, e wavoki tiko na kemudou meca na tevoro, me vaka e dua na laioni , ka vakasaqara tiko eso me tiloma. Ke’o butubutu rua, kao sega ni katakata se batabata, ona luaraki tani. Ia o ira sa yalodina vua na Turaga, era na tiko ena nona yasana vuni ko Koya sa cecere sara, Ena tiko ga e na yaloyalo i Koya sa kaukauwa. O na butuka na laioni kei na gata loa. Na laioni kaukauwa kei na gata ko na buturaka sara. (Ref Same 91: 1-1, 13-13)
Vakadinataka na vakabauti Jisu. Vakadinataka na nomu muri koya. Vakadinataka na nomu lai lotu. Vakadinataka na nomu wilika na nona vosa, ka bibi tiko kina na kena muri na nona vosa, ni sai koya oqo na loma ni Kalou. Rogoca vakavinaka, eda sa bula tiko ena gauna sara e muri qo. Ke sa tukuna tiko na vosa ni Kalou na veika meda biuta tani mai na noda bula, kakua ni vakasaqara e dua nai ulubale me’o rawa ni vakadonui iko tiko kina, ena nomu maroroya tiko na ka e dodonu me biu tani. E vinaka cake mo muria na vosa ni Kalou bula, mai na noda vakalomavinakataki ira na tamata, ke mani wekamu madaga vakayago. Dro tani mai vei ira, kera sega ni muria tiko na loma ni Kalou. Rogoca na vosa ni Turaga Maciu 12:48-50, “O cei na tinaqu? Se ko cei ko iratou na taciqu. A sa dodoka na ligana kivei ira na nona tisaipeli, ka kaya, Raica na tinaqu kei ira na taciqu! Ko koya yadua ena kitaka na loma i Tamaqu sa tiko mai lomalagi; sai koya oqo na taciqu , kei na ganequ, kei na tinaqu.”
Me da gumatua ena muri koya, o koya na noda i vakabula. Me vakaukauwataki keda ena kaukauwa ni Yalo Tabu, me da rawa ni lakova kina na gaunisala qiqo, ka meda qaqa ena i valu vinaka, nai valu ni vakabauta. Me rokovi, me dokai tikoga na Kalou kei Jisu Karisito. Emeni
Published (19/03/2026)